Врз основа на програмата за ран детски развој и планот на нашата градинка, за возрасна група деца 2 до 3 години, денес ја обработуваме темата со наслов:
Сообраќајни превозни средства – Воден сообраќај
Цели на оваа активност се:
- Запознавање, препознавање и именување на водените превозни средства како и стекнување на основни информации за водениот сообраќај.
- Развој на фината и ситна моторика на дланките и прстите при превиткување и користење на ликовен материјал односно правилно држење на боичка, фломастер или молив. Користење на креативноста во секојдневните активности водени преку пристапот на учење и моторниот развој на децата.
За реализација на оваа активност ќе ви биде потребно:
- Слики од неколку водени превозни средства (кајче, брод, подморница).
- Ликовен материјал – боици,
- хартија во боја,
- бела хартија,
- сад со вода,
- картонска подлога од јајца,
- цевки за сок,
- украсна хартија,
- лепило,
- ножички,
- макета од разновиден сообраќај.
Опис на активноста која можете да ја реализирате заедно со вашите деца кои се на возраст од 2 до 3 години.
Во овој период на раниот детски развој децата почнуваат да покажуваат особен интерес кон откривање на нови работи и имаат свој индивидуален пристап кон одредени нешта. Направете го запознавањето на водениот сообраќај на забавен начин и потикнете го истражувањето и љубопитноста децата.
Со детето разгледувајте разновидни сликовници и слики воедно водете разговор по нив односно со нивна помош поттикнете го детето да ви покаже на она водено превозно средство за кое ќе го прашате секогаш поставувајте едноставни и кратки прашања :
– Каде е бродчето на сликата? Покажи ми го кајчето? Каде пловат итн.
Од обична бела хартија или листови во боја направете бродчиња со превиткување односно оригами, потоа дадете им ги на децата да ги украсат по свој личен избор со ликовен материјал и на крајот во наполнет поширок сад со вода овозможете му на детето да ги пушти бродчињата на површината на водата.
Доколку сте во можност оригамот заменете го со друг вид на изработка и вежбајте правилно користење на молив или дрвена боичка цртајќи бранови под бродчето. Во прилог следат слики од предложените активности.
ЗАЕДНО ДА УЧИМЕ НИЗ ИГРА.