Верувам дека честопати како родители се прашувате : Што навистина посакувам за моето дете?, Кои квалитети да ги развијат и понесат со себе во животот? Најверојатно сакате да бидат среќни, независни и успешни. Веројатно сакате да живеат живот полн со значење и цел.

А сега размислете колкав дел од вашето време го поминувате со вашето дете во градењето на овие квалитети. Повеќето родители сметаат дека немаат доволно време за создавање на искуства што ќе им помогнат на децата да напредуваат .Но и она малку време што го поминувате со нив може да биде доволно за да им помогнете да го достигнат својот вистински потенцијал. Користете ги вашите можности за секојдневна интеракција за да им помогнете на вашите деца да напредуваат.
Наместо да се трудиме да постојано ги заштитуваме децата од постојаните животни потешкотии можеме да им помогнеме да ги интегрираат тие искуства во нивното разбирање на светот околу нив и да научат нешто од нив. Какви чувства ќе развијат децата во нивните животи не зависи само од нив туку и од тоа како вие како родители и другите лица кои се грижат за нив ќе реагираат на нивните чувства.

Имајќи го ова во предвид, наша примарна цел е да понудиме алатка со која ќе го олесниме родителството и односите со вашите деца . За таа цел предлагаме стекнување на сознанија за мозокот и неговата функција. Дури и малите деца од 4-5 години можат да разберат неколку важни основи за начинот на кој работи мозокот а за возврат да се разберат себе си и нивното сопствено однесување. Овие знаења може да бидат многу моќни и за детето но и за родителот кој сака да дисциплинира и сака да двете страни се чувствуваат добро.

Нудиме стратегии како да им помогнете на децата да научат како да ги регулираат своите чувства, да бидат посреќни и да донесуваат добри одлуки во ситуации на силни емоции. Сакаме да ги научиме да „паузираат“ пред да дејствуваат, да размислат за последиците, да размислат за чувствата на другите, да донесат етички и морални проценки. Понекогаш сме горди на однесувањето на нашите деца но понекогаш прават да ги кренеме рацете во вис. Токму во вакви ситуации може да зборуваме за мозокот на повеќе начини.

Како предлог ви ја нудиме приказната „Во куќата на мозокот“

ВО КУЌАТА НА МОЗОКОТ

Мозокот е како куќа на два ката.

Долниот кат е место каде што живеат многу важни ликови. Тие постојано се грижат за работите како што е дишењето, основните чувства и справувањето со опасности . Нивните имиња се: Стојна, Бенко и Душко. Сите тие брзо реагираат со цел да останат живи и неповредени. Стојне е позната како лик кој се бори, Бенко како лик кој најчесто бега а Душко како лик кој се занимава со дишењето. Сите тие штом воочат некоја опасност или проблем испраќаат пораки до другите делови на телото да се подготват за борба или бегање, па така срцето започнува забрзано да чука, белите дробови забрзано да дишат, кожата да се наежи, дланките да се стегнат во тупаници, мускулите да се стегнат за да побрзо трчаме… но исто така може да им се каже на деловите од нашето тело да останат многу неподвижни за да можеме да се скриеме од опасноста. Без воопшто да размислуваат свесно, тие се спротивставуваат на опасноста што е можно побрзо.

Мозокот на горниот кат е многу посложен. На овој кат главен е ликот Решко но со него живеат и Мирка смирувачката љубезниот Љупчо и Фанче креативката. Решко постојано размислува, решава проблеми, внимателен е, прави избор и донесува добри одлуки. Тој е многу трпелив. . Тој прво чека се да види, слушне,… а потоа донесува решение што треба ние да правиме.

Скалите се еден од најважните делови во куќата на мозокот. Преку нив Решко може да следи што се случува на долниот кат. Ликовите од првиот и вториот кат постојано си испраќаат пораки и меѓусебно се договараат. Но понекојпат се случува да станарите од првиот кат реагираат пребрзо без да се договорат со Решко.

Замислете дека има топка која лета кон вашето лице со многу голема брзина. Како би реагирале вие? Веројатно ќе почувствувате како срцето ви чука многу побрзо и брзо ќе ги кренете рацете за да го заштитите лицето, навидум, дури и без да размислувате за тоа. Стојне ја превзема контролата и му дава на телото упатства како да се спаси од опасноста топката да ве удри по лице.

Или пак сетете се кога врескавте и плачевте кога мама за прв пат ве остави во градинка. Станарите од првиот кат на куќата на вашето мозоче, ве натераа да плачете . Размислувајќи за тоа, сега, сметате дека тоа било глупаво и погрешно затоа што да се биде со учителките и дечињата од групата не било опасност.

Кога Бенко погрешно ќе ни каже да се плашиме, Се јавува Решко од вториот кат и заедно со смирувачката Мирка, љубезниот Љупчо и креативната Фанче ја поправаат грешката на Бенко. Решко веднаш испраќа информација да се смириме и ни вели дека мама ќе не земе од градинка.

КРАЈ

 

Радослава Спасовска, психолог
Катерина Равојска, воспитувач