Врз основа на програмата за ран детски развој и планот на нашата градинка, за возрасна група деца 4 до 6 години, денес ја обработуваме темата со наслов:
Раскажете приказна преку кукли од хартија
Цели на оваа активност се:
- Оспособување за детско ликовно изразување со употреба на различни средства, стекнување на нови искуства.
- Правилно користење на ликовен прибор, именување на бои.
- Учество во заеднички игри со возрасни.
- Внимателност при слушање на приказните, поставување на прашања во врска со неа, разбирање на содржината, умешност за идентификување на главните ликови и дејството во приказната, прераскажување.
- Верба во себе и своите способности.
За реализација на оваа активност ќе ви биде потребно:
- Колаж во повеќе бои
- Хамер или картон во повеќе бои
- Платно во повеќе бои доколку имате, во спротивно капите и брадите на џуџињата можат да се изработат и од хартија
- Четири копчиња со средна големина
- Парче црн конец
- Фломастери
- Подвижни очиња
- Ножици
- Лепак
- Линијар.
Опис на активноста која можете да ја реализирате заедно со вашите деца кои се на возраст од 4 до 6 години.
Започнувате разговор со детето за неговите најомилени приказни, при неговото набројување му ја споменувате познатата приказна „Снежана и седумте џуџиња“. Му кажувате дека денес ќе му ја раскажете оваа приказна на еден поинаков и многу поинтересен начин, само што претходно треба нешто заедно да изработите.
Изработувате кукли (дел од џуџињата од приказната- ликови од приказната) од хартија.
Пред вас и вашето дете е потребниот материјал.
Еве ја постапката:
- Превиткувате картон или хамер во боја во висина од 15-20 см
- Врз него додавате уште една превиткана хартија но да биде во друга боја.
- На страна ја цртате брадата на бела основа (платно или хартија колаж) и потоа ја сечете и лепите на превитканиот картон.
- На средина на превитканиот картон врзувате црн конец и на него го додавате копчето.
- Над залепената брада цртате уста, нос веѓи и ги лепите подвижните очиња.
- Потоа ја изработувате капата која може да се изработи од хартија или платно ,цртате и сечете и ја додавате на врвот од превитканата хартија. Ги боите носот и устата.
Се надевам дека ќе се потрудите да ги изработите сите четири џуџиња кои што се дадени на сликата, бидејќи постапката е иста за сите, само да бидат во различни бои.
Потоа на детето му ја раскажувате приказната „Снежана и седумте џуџиња“ како што му ветивте со помош на куклите.
По вашето раскажување побарајте од детето да ја прераскаже приказната самостојно, при што и тоа ќе ги користи изработените кукли.
На крајот пофалете го вашето дете за успешно изработените кукли, како и успешно прераскажаната приказна од негова страна со помош на куклите од хартија, за да ја зајакнете неговата самодоверба.