Врз основа на програмата за ран детски развој и планот на нашата градинка, за возрасна група деца 3 до 4 години, денес ја обработуваме темата со наслов:
ПРАВИМЕ ВРТЕЛЕШКA
Цели на оваа активност се:
- Запознавање на децата со начинот на изработка и начинот на движење (вртење) на вртелешките.
- Поттикнување и усовршување на координацијата на локомоторниот систем, движење, трчање, вртење, координација око-рака, развивање на креативност.
- Развивање на смисол за обликување на хартија и други видови материјали.
За реализација на оваа активност ќе ви биде потребно:
- Бела хартија, хартија во боја или украсна
- Ножички
- Лепило
- стапче или сламка.
Хартиената вртелешка можете да ја направите во различни бои и димензии и да ја искористите како нов декор во вашиот дом или балкон. Исто така овие хартиени вртелешки се толку едноставни за правење што слободно можете да се забавувате правејќи ја заедно со вашите деца и потоа да ги оставите тие да си играат со новата играчка вртејќи ја на ветрот.
Заедно со вашите деца проследете ја постапката на правење вртелешки и поттикнете ги самостојно да ја превиткуваат хартијата.
Чекор 1: Хартијата исечете ја во форма на коцка, превиткајте ја дијагонално од едната страна, исправете ја хартијата и превиткајте ја повторно дијагонално од другата страна.
Чекор 2: Со ножички исечете ги дијагоналните линии од сите четири страни на коцката оставајќи мал простор од центарот
Чекор 3: Потоа ќошевите од засечените триаголници треба да ги споите во средината на коцката. Можете да ги продупчите со нитни или шпенагли или да ги залепите со лепило.
Чекор 4: Откако ги превиткавте ќошевите следно што треба да направите е да ставите стапче или сламка на задната страна на вртелешката како држач. Доколку се одлучите за сламка, во таа ситуација шпенаглата или нитната лесно ќе се продупчат низ сламката ,а доколку се одлучивте за стапче тогаш ќе треба да заковате шајка на стапчето за да направите дупка и потоа шпенаглата или нитната да ја протнете низ средината на вртелешката и да ја прицврстите на стапчето.
Вашата вртелешка е готова и подготвена да ја завртите на убавиот летен ветар!
Доколку за вашата вртелешка избравте бела хартија или во боја, овозможете му на вашето дете самостојно да ја декорира со боички или фломастери.
Со реализација на оваа активност ќе ја поттикнеме и развиеме љубопитноста и креативноста кај вашите деца, како и оспособување на децата за самостојност во текот на активностите.
Во интерес на Вашето дете е да ги следите нашите објави.
ЗАЕДНО ДА УЧИМЕ НИЗ ИГРА.