Врз основа на програмата за ран детски развој и планот на нашата градинка, за возрасна група деца 3 до 4 години, денес ја обработуваме темата со наслов:
ОД ГАСЕНИЦА ДО ПЕПЕРУТКА
Цели на оваа активност се:
- Запознавање со животниот циклус на една пеперутка и интерпретирање на веќе научени гатанки.
Стандарди:
- Детето е способно да истражува и открива нови работи .
- Детето стекнува информации за средината и опкружувањето , преку набљудување и манипулација .
- Детето ги набљудува и опишува карактеристиките на живиот свет.
- Детето може да го збогати својот речник и да покаже напредок во правилниот говор .
Преку илустрација објаснете му го на детето животниот циклус на една пеперутка. Дека од јајцето на пеперутката се создава гасеница или ларва на пеперутката , која го менува својот изглед, расте и се преобразува, хранејќи се со зелени листови . По некое време се завиткува во кожурец што личи на чаура и спие како кукла. Од кожурецот излегува прекрасна пеперутка со шарени крила.
Веднаш потоа можете и да научите и една гатанка:
Прекрасна е и нежна како цвет,
во пролет има среќен лет.
Има крила а не е птица,
настанала од грда гасеница .
Ај погоди што е тоа ?
П _ _ _ _ _ _ _ A
На крај на детето можете да му дадете лист на кој има насликано или испринтано пеперутка а тоа да ја обои со водени бои.
