Врз основа на програмата за ран детски развој и планот на нашата градинка, за возрасна група деца 4 до 6 години, денес ја обработуваме темата со наслов:
НАПРАВИ ЕДНОСТАВНО И БРЗО „БУБАМАРА“
Цели на оваа активност се:
- Воочување и опишување на карактеристиките на годишното време пролет.
- Елементарни сознанија за инсектите во пролет-нивно препознавање, именување, опишување.
- Оспособување за детско ликовно изразување со употреба на различни средства, стекнување на нови искуства.
- Правилно користење на ликовен прибор, именување на бои.
- Учество во заеднички игри со возрасни.
- Верба во себе и своите способности.
За реализација на оваа активност ќе ви биде потребно:
- Парче црн картон,
- црвена хартија,
- лепило (стик),
- ножички,
- молив,
- подвижни очиња,
- три капачиња со различна големина.
Со детето можете да излезете надвор и да ги набљудувате убавините на годишното време пролет-расцветани дрвја, разни обоени цветови, раззеленета и бујна трева, распеаните птици и особено внимание обрнете на инсектите во пролет – пеперутки, бубамари…
Откако ќе се вратите дома можете едноставно и брзо да направите бубамара.
Прво ги употребувате најголемото и најмалото капаче како шаблони, со чија помош ќе исцртате две кружници со различна големина на црниот картон. Потоа исечете ги.
Од црниот картон исечете шест мали крукчиња и шест тенки ленти.
Со капачето со средна големина исцртајте две кружници на црвената хартија и исечете ги.
Залепете го помалиот и поголемиот круг така што ќе го формирате телото а малите ленти залепете ги зракасто, по три на секоја страна за да ги претставуваат нозете на бубамарата.
Двата црвени круга превиткајте ги на половина.
Добиените форми залепете ги на телото (како на сликата), тоа ќе бидат крилцата.
Малите црвени крукчиња залепете ги по три на секое крилце.
Залепете две подвижни очиња на главата.
На крај исечете ги и залепете ги двете црвени „антени“.
Оваа бубамара е подготвена да украси некое катче во вашиот дом.
Секако на крајот пофалете го вашето дете за да ја зајакнете неговата самодоверба.
По успешно завршената работа можете заедно да ја рецитирате стихотворбата „Бубамара“.
Бубамара
Со крилцата бубамара
на цвет личи
и на шара.
Таква шара-цветна пара,
што се вика бубамара.
Кој не сака?
Кој не бара?
Летни, летни бубамаро,
најубава зунзаро,
да ти сплетат зраци лулка,
да те сони вечер Јулка.