Врз основа на програмата за ран детски развој и планот на нашата градинка, за возрасна група деца 3 до 4 години, денес ја обработуваме темата со наслов:
ДЕТСКИ САЛОН, ПРАВИМЕ ФРИЗУРИ!
Првото шишање на Вашето дете е секогаш посебен и важен момент. Одењето во фризерски салон, е искуство, кое детето порано или подоцна мора да го помине.
Како да направиме вовед на малите фризери? Со детето започнете разговор на тема шишање. За што служи фризерскиот салон? Зошто одиме таму? Дали во фризерскиот салон одат само возрасни или може да одат и деца?
Без разлика дали на фризер оди мама, баба или друг близок член на семејството… сите во фризерски салон одиме да ја скратиме или средиме косата и да изгледаме уредно.
Активноста која Ви ја предлагаме е игра на улоги, каде детето ја има главната улога на мајстор-фризер.
За оваа активност се потребни: хартија, лепак, детски ножички, празни шишенца од шампон, лакови за коса, дрвени моливчиња кои би ги користеле како витлери, машнички, огледалце… Детето може да ја средува косата на мама, тато, дада или бато.
Освен што оваа активност е забавна за децата и ја развива нивната креативност и фантазија, таа содржи и елементи на движење каде се развива фината моторика.
За крај, бидете креативни, на Вашето дете подарете му картичка “сертификат” за успешно завршена работа, успешно прво шишање! Го прогласувам салонот за отворен!
После оваа активност, одењето на фризер со Вашето најмило, ќе стане вистинска забава.
